Vefurinn framhaldsskoli.is er fyrst og fremst hugsaður sem kennslu- og þjálfunarvefur fyrir nemendur í framhaldsskólum. Þar er boðið upp á kennslu- og skýringarefni í helstu námsgreinum framhaldsskólans, auk gagnvirkra og útprentanlegra þjálfunaræfinga. Þá er þar einnig að finna heildstætt námsefni fyrir staka áfanga ef svo ber undir.

Eins og fram kemur hér til hliðar er hann ætlaður bæði kennurum og nemendum og við skulum skoða nokkrar hugmyndir um hvernig hvor hópurinn fyrir sig getur nýtt sér vefinn.

Við höfum lagt okkur í líma við að hafa vefinn einfaldan í notkun þannig að notendur ættu að verða fljótir að finna það sem þeir leita að ef það á annað borð er að finna á vefnum. Hentugast er að nota námsgreinatenglana hér til hliðar, en þeir vísa hver inn á sína sérsöku námsgreinarsíðu. Þar er svo hægt að skoða allt námsefni í viðkomandi námsgrein. Einnig er hægt að nálgast áhugaverð verkefni beint af forsíðu, en við höfum komið fyrir stökum áhugaverðum tenglum í dálkinum lengst til hægri. Hér fyrir neðan getið þið svo skoðað dæmi um valið efni:

• Sýnisbók íslenskra bókmennta
• Almennar gagnvirkar stærðfræðiskýringar
• Heimspekingar fyrr og nú
• Heimurinn í hnotskurn - Afghanistan
• Enskar blaðagreinar
• Rejsen til Udgårdsloke

Stóran hluta efnisins á vefnum er bæði hægt að nálgast á vef og/eða í sérútbúinni prentúgáfu. Prentaða efnið samanstendur ýmist af stökum verkefnum sem gott getur verið að grípa til þegar þannig stendur á og hægt er að nota með öðru efni, og einnig heildstæðu efni eða kennslubókum.

Þá er stór hluti efnisins þannig uppbyggður að hægt er að nota það sem valefni, þegar kennari vill að nemendur séu hver um sig að vinna að ólíku efni, innan sama sviðs. Þegar nemendur eiga til dæmis að velja sér texta til að vinna með og kynna fyrir bekknum, þá ætti t.a.m. Sýnisbók íslenskra bókmennta, enskar bókmenntir og danskar blaðagreinar að henta mjög vel.

Á vefnum bjóðum við upp á fjölbreytt úrval skýringa á því efni sem nemendur eiga að kunna skil á í framhaldsskóla og geta nemendur sótt það sér til skýringar að vild. Þá er þar einnig að finna margt sama efnið og þeir eru að læra í skólanum, þó í öðrum búningi sé, eins og t.a.m. Íslendingasögur. Textarnir eru stigskiptir til að auðvelda notkun nemenda og kennara.